Phili 1 | NdeIBE | STEP | UPhawuli loThimothi, izinceku zikaKhristu uJesu, Kubo bonke abangcwele kuKhristu uJesu eFiliphi, kanye lababonisi labadikoni:

Philippians 1

1 UPhawuli loThimothi, izinceku zikaKhristu uJesu, Kubo bonke abangcwele kuKhristu uJesu eFiliphi, kanye lababonisi labadikoni:

2 Umusa lokuthula kakube kini kuvela kuNkulunkulu uBaba laseNkosini uJesu Khristu.

Ukubonga Lokukhuleka

3 Ngiyambonga uNkulunkulu wami sikhathi sonke lapho ngilikhumbula. 4 Emikhulekweni yami yonke ngikhulekela lonke, ngihlezi ngikhuleka ngokuthokoza 5 ngenxa yokuhlanganyela kwenu evangelini kusukela ngosuku lwakuqala kuze kube khathesi, 6 ngilethemba lalokhu ukuthi lowo owaqalisa umsebenzi omuhle kini uzawuqhubekisela ekupheleni kuze kube lusuku lukaKhristu uJesu.

7 Kuqondile ukuba ngizwe kanje ngani lonke, njengoba ngihlezi ngilani enhliziyweni yami, ngoba langabe ngibotshiwe kumbe ngivikela njalo ngiqinisa ivangeli, lonke lihlanganyela lami emuseni kaNkulunkulu.

8 UNkulunkulu angafakaza ukuthi lonke ngilikhumbula kangakanani ngothando lukaKhristu uJesu.

9 Njalo umkhuleko wami yilo: ukuba uthando lwenu lwande kokuphela ekwazini lasekuzikeni lokuqedisisa, 10 ukuze lanelise ukubona okuhle njalo lihlambuluke lingabi lasici kuze kube lusuku lukaKhristu, 11 ligcwele izithelo zokulunga eziza ngoJesu Khristu – ukuba adunyiswe njalo abongwe uNkulunkulu.

Ukubotshwa KukaPhawuli Kuqhubela Ivangeli Phambili

12 Bazalwane, ngithanda ukuba likwazi ukuthi okwenzakale kimi kusizile impela eku-qhubeleni ivangeli phambili. 13 Ngalokho, sekube sobala kubo bonke abalindi besigodlo lakwabanye bonke ukuthi ngibotshelwe uKhristu.

14 Ngenxa yokubotshwa kwami, abazalwane abanengi eNkosini sebelesibindi sokukhuluma ilizwi likaNkulunkulu ngesibindi esikhulu kungelakwesaba.

15 Kuliqiniso ukuthi abanye batshumayela uKhristu ngenxa yomona lombango, kodwa abanye ngenxa yesifiso esihle. 16 Laba benza lokhu ngothando, bekwazi ukuthi ngifakwe lapha ukuba ngivikele ivangeli. 17 Abakuqala batshumayela uKhristu ukuzikhukhumeza, bengeqotho, becabanga ukuthi bangangidalela uhlupho ngisekubotshweni. 18 Kodwa-ke kuhluphani? Into eqakathekileyo yikuthi ngezindlela zonke, langabe kuyizisusa zamanga loba iqiniso, uKhristu uyatshunyayelwa. Njalo ngenxa yalokhu mina ngiyathokoza. Yebo, ngizaqhubeka ngithokoza, 19 ngoba ngiyazi ukuthi ngemikhuleko yenu langosizo lukaMoya kaJesu Khristu, okwenzakale kimi kuzaletha ukukhululwa kwami. 20 Ngokutshiseka ngilindele njalo ngithemba ukuba angiyikuyangeka langayiphi indlela, kodwa ngizakuba lesibindi esaneleyo ukuze kuthi khathesi njengenjwayelo uKhristu uzaphakanyiswa kimi, loba ngokuphila kumbe ngokufa. 21 Ngoba kimi, ukuphila kunguKhristu lokufa kuyinzuzo. 22 Uma ngingaqhubeka ngiphila emzimbeni, lokhu kuzakutsho umsebenzi olezithelo kimi. Kodwa-ke kuyini engizakukhetha? Angazi! 23 Ngiphakathi kwakho kokubili: Ngifisa ukusuka ngibe loKhristu, okungcono kakhulu; 24 Kodwa kuyasweleka kakhulu kini ukuba ngibe ngilokhu ngiphila kulumzimba. 25 Sengikholwe lokhu, ngiyakwazi ukuthi ngizakuba khona, njalo ngizaqhubeka ngilani lonke ngenxa yokuthuthuka kwenu lokuthokoza ekukholweni, 26 ukuze kuthi ngokuba lani kwami futhi ukuthokoza kwenu kuKhristu uJesu kuzakwanda ngenxa yami.

27 Loba kusenzakalani, lina ziphatheni ngendlela efanele ivangeli likaKhristu. Ngakho, langabe ngiyeza ukuzalibona loba ngizwe nje kuphela ngani ngingekho, ngizakwazi ukuba liqinile ngamoya munye, lilwela ukholo lwevangeli njengomuntu munye, 28 kungekho kwethuswa langayiphi indlela yilabo abaliphikisayo. Lokhu kuyisibonakaliso kubo ukuthi bazachithwa, kodwa lina lizasindiswa nguNkulunkulu. 29 Ngoba kunikelwe kini ngenxa kaKhristu kungasikukholwa kuye kuphela, kodwa lokumhluphekela, 30 njengoba lilwisa hlupho lunye elabona ngilalo, lakhathesi liyezwa ukuba ngilokhu ngilalo.